მარტვილის კანიონი

0 კომენტარი

 

შთაბეჭდილებებით აღსავსე მოგზაურობისთვის მარტვილის კანიონი ძალიან ზუსტი არჩევანია. უზარმაზარ და ბუნებრივად წარმოქმნილი ქვის კედლები და მათ შორის გამავალი ხეობა - ერთ-ერთი ყველაზე ლამაზი ადგილია, რომლის საქართველოში ნახვაც შეგიძლიათ. აქ ნავით გასეირნება კი ნამდვილი ზღაპრული თავგადასავალია.

ეს არის მდინარე რიონს, ცხენისწყალს, ენგურსა და შავ ზღვას შორის მოქცეული კანიონისებურად გაჭრილი ხეობა, რომლის სიგრძეც 2400 მეტრია. კანიონში ორ ადგილას არის შენახული კირქვის ბუნებრივი ხიდები, რაც იმის მანიშნებელია, რომ აქ ოდესღაც კარსტული მღვიმე ჩამოიშალა. გარდა ამისა, კანიონის შუა წელში წარმოიშობა 12-15 მ სიმაღლის ვარდნის მცირე ჩანჩქერები და განსაკუთრებული სილამაზით გამოირჩევა. აღსანიშნავი ფაქტია, რომ კანიონის მიმდებარე ტერიტორიაზე სულ ცოტა ხნის წინ მკვლევარებმა დინოზავრის ნაკვალევი აღმოაჩინეს.

 

                                  “საქართველოს დამალული მარგალიტი, რომელიც ფენტეზის სამყაროში გაგრძნობინებთ თავს”

 

ცნობილმა ამერიკულმა ჟურნალმა Scuba Diving-მა მარტვილის კანიონი ჩართო იმ რვა ადგილის სიაში, რომლებიც ევროპაში დაივინგისთვის საუკეთესოა და ამავდროულად ადგილისთის საქებარი სიტყვებიც არ დაიშურა. „ეს ადგილი ჯ. რ. რ. ტოლკინის ერთ-ერთი წიგნის ილუსტრაციას ჰგავს, ადგილს, სადაც ელფები ცხოვრობენ. იქ არის კამკამა ჩანჩქერები, რომლებიც ციცაბო კლდეებიდან ეშვება. ეს კლდეები დაფარულია გვიმრებით და სუროს ხვეული ტოტებით, რომლებიც სადღესასწაულო შუქურებს ჰგავს. ყველაფერი უზომოდ ლამაზია" - წერენ გამოცემაში.

მარტვილში ამ ცოტა ხნის წინ დინოზავრების ნაკვალევი აღმოაჩინეს. დინოზავრების ნაკვალევის აღმოჩენამ ამ ლამაზი კუთხის ნახვის სურვილი ბევრ ადამიანს აღუძრა. სოფლის სახელის (სადაც დინოზავრის ნაკვალევი იქნა აღმოჩენილი) – გაჭედილის გაგონება ბევრ ადამიანში ღიმილს იწვევს. როგორც ამბობენ, მე-17 საუკუნის დასასრულს, სამეგრელოს მთავარს ბერძენი ოსტატები მოუწვევია, რომლებსაც მდინარე აბაშის ყველაზე ვიწრო ხეობაში აგურის ლამაზი ხიდი აუშენებიათ. ამით ხეობის ორივე ნაპირი გაერთიანდა, რომელიც მაშინ მეტად მნიშვნელოვანი, სტრატეგიული ადგილი ყოფილა. ე.ი. – ხეობა გაჭედეს. სწორედ აქედან მოდის სოფლის სახელწოდება გაჭედილი.

 

                   “ველური ბუნება, რომელსაც დაუვიწყარ სილამაზესთან ერთად დიდი ისტორიული მნიშვნელობა გააჩნია”

 

სოფელ ინჩხურსა და გაჭედილს შორის არსებულ სივრცეს, აბაშის ხეობის ულამაზეს ადგილს უწოდებენ, სადაც ჩანჩქერები ჩამოდის. წინათ აქ გაუვალი ტყე და საშიში ადგილი ყოფილა. ყაჩაღები აქ მგზავრებს უსაფრდებოდნენ და თავს ესხმოდნენ. სწორედ ამიტომ, ადგილობრივებმა ამ ადგილს ოფუცხოლე ანუ სწრაფად გასარბენი ადგილი უწოდეს. ეს სილამაზე, ბუნებრივია, სამეგრელოს მთავრებს – დადიანებს არ გამოჰპარვიათ; საბანაოდ და საქეიფოდ ისინი სწორედ აქ დადიოდნენ. ეკატერინე ჭავჭავაძეც თურმე იქ ბანაობდა და ამიტომ დადიანების საბანაო ადგილსაც უწოდებენ. სწორედ იქ აღმოჩნდა დინოზავრების ნაკვალევიც.

მარტვილის კანიონი მართლაც ზღაპრული ადგილია, რომელიც რელიქტური ტყეებით არის გარშემორტყმული. ასწლეულების განმავლობაში წყალი იკვლევდა გზას 40 მეტრის სიღრმის ხეობის კლდეებში. 

კონტაქტი

რუკაზე ნახვა

0 კომენტარი

5

კომენტარის დაწერა