პრომეთეს მღვიმე

5
ტურისტული ზონა ნამდვილი თავგადასავლებისთვის

დაწესებულების მახასიათებლები

ყველა მიმოხილვა

 

ბნელ გამოქვაბულებში სიარული არაერთი ამერიკული სათავგადასავლო ფილმის განუყოფელი ელემენტია. ბავშვობაში ინდიანა ჯონსის ადგილას ყოფნაც ბევრ ჩვენგანს სდომებია, ამ სურვილების ახდენის შესაძლებლობას საქართველოში პრომეთეს მღვიმე მოგცემთ. აქ შესულები მაშინვე პრეისტორიულ ხანაში იგრძნობთ თავს, სადაც ადამიანი და ბუნება ერთმანეთის პირისპირ რჩება. ბუნებრივად შექმნილი მღვიმე დაუვიწყარ შთაბეჭდილებებს დაგიტოვებთ და დაგარწმუნებთ, რომ განსაკუთრებულ ადგილას იმყოფებით.

 

                                       “50 000 წლის მღვიმე, რომელიც საქართველოს ერთ-ერთი ულამაზესი ბუნების ძეგლია”

 

პრომეთე - ბერძნული წარმოშობის სიტყვაა, ქართულად „წინდახედულს“, „შორსმჭვრეტელს“ ნიშნავს. ბერძნულ მითებში პრომეთე ღმერთებთან მებრძოლი და ადამიანების ინტერესების დამცველი გმირია. ღმერთების მიერ ტიტანების დამარცხების შემდეგ პრომეთე ადამიანების მხარეზე დადგა. როდესაც ზევსმა ადამიანებს ცეცხლი წაართვა, პრომეთე ავიდა ოლიმპოზე, ცეცხლი ლერწმის ღეროში ჩადო, ოლიმპოდან გამოიტაცა, ადამიანებს გადასცა და მისი შენახვა ასწავლა. ზევსი ამ ამბავმა გააჯავრა და მან, ღმერთების სურვილების წინააღმდეგ წასვლისათვის, ბრძანა, რომ პრომეთე მიეჯაჭვათ კავკასიონის მთის ერთ-ერთ კლდეზე. პრომეთეს მითი გავრცელებული იყო მთელს ხმელთაშუა ზღვის აუზში და კავკასიაშიც, სადაც იგი ამირანის შესახებ თქმულებას შეერწყო მრავალი საერთო ნიშნისა და დეტალის გამო.

პრომეთეს მღვიმის ბუნების ძეგლი იმერეთის რეგიონში, წყალტუბოს მუნიციპალიტეტში მდებარეობს. მას ასევე ყუმისთავის  მღვიმეს უწოდებენ. მისი სიგრძე 1,8 კმ-ია და მიწის ზედაპირიდან 40 მ-ის სიღრმეშია წარმოქმნილი. პრომეთეს მღვიმის 1 საათიანი საფეხმავლო მარშრუტი არგონავტების, კოლხეთის, მედეას, სიყვარულის, პრომეთესა და იბერიის ზღაპრულ დარბაზებს გაივლის და მღვიმეში მდინარე ყუმის გამდინარე ნაკადზე 15 წუთიანი სანაოსნო გასეირნებით მთავრდება. ნავით გასეირნება არ შედის სტანდარდული ბილეთის ფასში და იყიდება როგორც ცალკე სერვისი.

 

                                “ერთსაათიანი მოგზაურობა მღვიმეში, რომელიც თქვენს მეხსიერებაში სამუდამოდ ჩაიბეჭდება”

 

 

 პრომეთეს, იგივე ყუმისთავის, მღვიმის  დარბაზები აღმოაჩინეს დიდი ქართველი მეცნიერის, ვახუშტი ბაგრატიონის სახელობის საქართველოს მეცნიერებათა აკადემიის გეოგრაფიის ინსტიტუტის ექსპედიციის წევრებმა 1984 წლის 15 ივლისს.

ამ ყველაფერთან ერთად, პრომეთეს მღვიმე საუკეთესო ადგილია ულამაზესი სურათების გადასაღებად. გერმანელი სპეციალისტების მიერ მოწყობილი განათებები და ინტერიერის დეტალები თვალისმომჭრელ გარემოს ქმნის, რომლის ფირზე აღბეჭდვის სურვილი აუცილებლად გაგიჩნდებათ. პრომეთეს მღვიმე საქართველოს ერთ-ერთი ყველაზე მნიშვნელოვანი ტურისტული ადგილია, ამიტომ გირჩევთ, როცა დრო გამოგიჩნდებათ აუცილებლად მოინახულოთ იგი. 

მიმოხილვა

კომენტარები არ არის

-->